亞洲盃F組賽事周四煞科，日本（圖）憑武藤嘉紀同鹽谷司各入一球，以2:1反勝烏茲別克，3戰3勝以首名殺入16強會鬥沙地。至於輸波嘅烏茲別克就以次名出線，16強會對澳洲。今場開賽初段日本同烏茲別克互有攻守，但到40分鐘烏茲別克先開紀錄，效力俄超羅斯托夫嘅前鋒蘇梅洛度夫單人匹馬殺入禁區建功。不過開心唔夠三分鐘日本就靠武藤嘉紀頂入，為日本半場追成1:1平手。換邊後踢到58分鐘，今屆賽事首次上陣嘅鹽谷司禁區頂左腳射入世界波，為日本鎖定2:1勝局，3戰全勝順利殺入16強。同組另一場賽事，阿曼以3:1擊敗土庫曼，3戰得3分排第3，要靠最佳第3名資格出線，不過16強就要撼大熱嘅伊朗。