人生有幾多個十年？最近社交平台興起10 year challenge，網民紛紛上載今昔對比照，「出賣」10年前嘅自己，就連官員都有響應。呢排忙緊國歌法嘅政制及內地事務局局長聶德權，就將10年前時為社署署長嘅探訪舊照，同前日參加露宿者行動委員會嘅聯歡晚會活動相片做對比，話即使工作崗位變咗，自己對有需要人士嘅關懷係唔會改變。吖，政府明明要收緊長者綜援年齡門檻到65歲，呢句唔知攞景定贈興？
政壇人事幾番新
環境局局長黃錦星更加上載30幾年前、相信係在學時期嘅舊照，相中嘅佢同𠵱家一樣戴住大圓形眼鏡，外貌同家吓真係分別唔大，唯一唔同嘅係當年星星局長有一頭烏黑濃密秀髮，佢自己都留言話眨眼30幾年，「年輕時，已酷愛郊遊、行山及露營」，原來趁機宣傳環保，提醒大家要「郊野無痕」，「自己水壺自己帶」，而結果佢嗰把那些年嘅秀髮，成功呃到超過600個likes，果真髮力無邊。
睇番其他問責官員過去10年做過咩？2009年，特首林鄭月娥時為發展局局長，有份處理中環舊政府總部同主教山嘅保育問題；而現任政務司司長張建宗當年就係在任勞工及福利局局長。三司中以財政司司長陳茂波變化最大，10年前仲係立法會會計界議員，2012年佢獲梁振英賞識，諗住擔任新設嘅副財政司司長，點知政府架構改組建議因拉布難產，以為波波冇運行？No，當時任發展局局長嘅麥齊光突然因醜聞上任12日就辭職，由陳茂波冷手執個熱煎堆頂上，新一屆政府仲升呢至財爺，十年人事幾番新。
李八方
