基斯坦奴朗拿度（C朗）不愧係人生勝利組嘅球壇代表，事關禮拜三移師去沙地阿拉伯舉行嘅意超盃，正當祖雲達斯咬極都咬唔入AC米蘭之際，C朗隨即喺下半場如天兵降臨咁頭槌破網，唔只佢贏得加盟祖記後首個冠軍兼幫祖記破紀錄八奪意超盃，佢自己亦連贏10場決賽（見附表），近30場決賽仲入成19球，職業生涯已經贏咗27座冠軍！不過C朗涉姦案又有新進展，可謂場內威盡場外煩！
決賽之王連贏10次
今仗C朗表現持續勇猛，佢嘅傳射質素同準繩度，明顯係兩隊中最好嗰個，上半場兩軍攻門唔多，最有威脅就係C朗接應傳中側身「窩利」抽射，不過彈地後擦楣而出！易邊後米蘭都有柏德列古度尼勁射中柱，大難不死嘅祖記踢到61分鐘，C朗一次美妙走位接應比真歷嘅傳送，突破越位無人看管喺小禁區近門頂入，之後米蘭仲有中場基斯爾領紅，最終祖記憑C朗一箭定江山第八次贏得失落兩屆嘅意超盃。
賽後C朗話：「呢個係我喺祖記嘅第一個冠軍，所以我非常開心，喺2019年有個好開始，但家陣只係啱啱開始，我會繼續努力去贏下個獎盃。」又抵C朗咁得戚嘅，事關佢先後喺葡超、英超、西甲同意甲四個聯賽效力，球會生涯已贏咗26個冠軍，計埋為葡萄牙喺2016年贏嘅歐國盃，佢職業生涯已贏咗27個錦標；國際足協仲統計出，C朗近30場決賽入咗成19球，自2014年起近10次決賽仲贏晒，堪稱決賽之王。值得一提嘅係，同C朗一樣威爆嘅「不敗拳王」美韋達，今場亦有入場睇住C朗捧盃，賽後仲踩埋入更衣室同C朗佢哋合照。
前女友爆成日媾女
雖然C朗場內非常風騷，不過場外依然被涉姦醜聞困擾，英國BBC最新消息話，案件嘅原告兼受害人Kathryn Mayorga嘅律師，將會去倫敦同一個自稱係C朗前女友嘅人見面，據報呢位就係近日公開揚言，會幫對方告C朗嘅英國真人騷女星Jasmine Lennard，佢仲話C朗唔係外界諗咁完美，成日發短訊媾女，仲收集咗好多訊息同錄音，要踢爆C朗嘅良好形象咁話，睇嚟C朗仲有排煩喇！