曼聯自從由名宿蘇斯克查做咗看守領隊之後，球隊連贏六場之餘，仲有四位球員率先做老竇，喜事重重。首先係盧卡古，有報道話佢缺席聖誕節前後嘅兩場比賽，就係陪女友去美國做手術，迎接第一個愛情結晶品；至於中場保羅普巴嘅囝囝，亦傳喺佢去杜拜集訓之前出咗世，周二見普巴同女友行街，女友已經收晒身。
尼曼查馬迪就做第三任老竇，周一亦多咗個女，而費特洛迪古斯兩日後亦宣佈囝囝出世，仲有域陀連迪路夫、基斯史摩寧同埋達美安都宣佈咗會做老竇，真係可以開個會傾湊仔經。至於俾曼聯炒咗嘅摩連奴，有報道話佢收咗1,800萬鎊解約金咁多，但要簽份保密協議，唔可以爆曼聯內幕。