特首林鄭月娥一句：「係各位（議員）批准嘅」，激到成班建制派紮紮跳，事隔幾日，林鄭「歸咎」自己「直言」所致，總之將來講嘢有技巧啲。其實識得林鄭嘅人，都知道佢幾咁自負；八方翻查佢過往「直言」表現，驚嚇度方面其實一直出色。
四年前娥特做政務司司長時，出席活動時只不過聽到福音就有感而發，覺得喺政府做「正義」嘅工作會被人責難，於是話「天堂已經預留咗個位畀我」，在場人士聽到都滴晒汗。至2016年，娥特嘅「直言」越嚟越直，佢接受訪問時曾指有次被前議員黃毓民鬧：「跟埋梁振英，相由心生，你睇你個樣越嚟越肉酸」，佢話當場想反駁「我老公話我越來越靚，因為心地善良，所以越來越靚」。雖然情人眼裏出西施，但都唔使「直」到聽到人眼凸凸。
毛姨︰刻薄小器
而鉛水事件爆發，立法會要用特權法調查，娥特直頭上咗身，爆出廣為流傳嘅「官到無求膽自大」，仲話民主派逼公務員飲鉛水係令公僕受辱。唔通飲鉛水嘅公眾就冇受辱？八方都諗唔通。除咗為鉛水，娥特亦試過為俗稱「網絡23條」嘅《版權條例草案》「直言」。佢夠膽話自己「一啲都唔清楚」草案嘅內容，但就叫議員「履行憲制責任，喺立法會裏面審議呢條條例草案」，因為議員有9萬蚊月薪、20萬開支償還款額同埋約60萬約滿酬金。
八方問過民主派，無不覺得娥特嘅「直言」實情係挑釁。議會陣線毛孟靜話性格決定命運，娥特嘅「直言」只係反映佢嘅「笑面虎」、尖酸、刻薄、小器個性，咪用「心直口快」做擋箭牌囉。有建制派話林鄭確實做嘢、講嘢都好直接，以後若識得婉轉就梗係好啲，所謂「話到口邊留半句」，唔知林鄭，收唔收到？
李八方