皇家馬德里星期日憑後備上陣嘅丹尼施巴路斯喺完場前兩分鐘射入絕殺罰球，作客以2:1險勝貝迪斯，喺西甲聯賽重返勝軌。不過，皇馬嘅法國球星賓施馬因為右手受傷，半場被換出，之後證實佢右手尾指骨裂，皇馬喺官網表示會繼續監察賓施馬嘅狀況。
皇馬今場開波13分鐘由莫迪歷先拔頭籌，半場領先貝迪斯1:0。不過，本身已經有加里夫巴利、馬高阿辛斯奧、泰拔高圖爾斯、卻奧斯等眾多傷兵嘅皇馬，再添一名傷兵，賓施馬半場因右手受傷要退下火線。貝迪斯喺67分鐘靠簡拿利斯嘅入波追平，皇馬要到88分鐘先靠後備上陣嘅丹尼施巴路斯罰球破網，以2:1險勝。
雖然皇馬贏波，但由於殘陣出擊，全場控球率只得26%，係近7年最低，上一次係2012年摩連奴麾下鬥巴塞，只得27%控球率，不過皇馬今仗對手只係貝迪斯，贏得咁辛苦真係似支小型班。