公民黨黨魁楊岳橋（圖）上周三因為掛住喺辦公室睇《國歌法》記者會直播，令佢自己事前大事宣傳有關單程證審批權嘅議案，最終因為自己「關鍵缺席」而難產，無法喺立法會大會啟動辯論，由於單程證議題極具爭議性，唔少市民都希望議事廳可以就此認真辯論，奈何最終甩轆收場，相信唔少市民都好失望，AY亦即時鞠躬道歉。
而查實唔單止市民，好多議員同佢哋辦事處職員都為呢次發言花咗好多時間同心思準備，AY都深明自己因一時大意嘥咗唔少人嘅心機，所以繼公開致歉後，噚日再去信向全體議員同議助致歉。佢喺信中話，自己因故未能及時趕回會議廳動議「單程證政策」議案，令議案未能喺大會討論，向各位議員致以深切歉意，又希望議員代為向今次負責資料搜集、提交修正案同撰寫發言稿嘅助理同事，轉達佢真誠道歉。做錯當然要認，尤其作為議員，everyone is watching you，致歉之後就係改正嘅開始。