上星期二中午出街應約吃午飯前，突然心血來潮，拿出另一部手機，睇吓有乜電郵先，一上網就睇到三十幾個電郵，一路睇一路刪除，費事儲藏太多資料，令手機記憶系統爆燈。突然間睇到午飯取消嘅電郵，係G先生秘書送過嚟嘅，簡單咁講，就係話G先生突有緊急事情，是日午飯取消，謹此致歉。
哦，唔駛出門啦，於是打電話畀電腦J：「喂，你知唔知呀，G先生取消飯約嘞！」電腦J曰：「已經唔係第一次，不如我兩個去上海總會吃麵算數。」又好啫，點知去到上總，原來佢又臨時搵埋理事F去，既有理事F在，我地想搶住埋單都冇可能啦，真唔好意思。
理事F係工程教育有心人，經常為大學籌集獎學金畀工學院優秀學生去美國各校深造，但是日佢有感而發：「年年都係姓XYZ嘅內地學生攞到獎學金，啲香港本地學生去咗邊呢？本地生好似冇競爭力噃！」呢個問題，佢問我，我問邊個？或者捐錢畀環球商業科學生，就會有本地生爭取到獎學金啩，大家都知道本地大學嘅理學院、工學院，攞一級榮譽嘅幾乎盡是內地生，頒獎學金以學業成績為優先考慮，冇理由唔睇成績而睇內地生、本地生之分別，而有不同評審準則嘅啫。
幾日前碰到一位初創投資者，係三十年前港大double E尖子，在銀行界、投資界好有經驗，同佢講起初創企業，佢又係同理事F一樣感覺：「不少科技初創企業創辦人係內地工科畢業生，本地生數目比較少。」問佢知唔知道原因，呢位投資C話：「三十幾年前我地入學成績與醫學院學生有得爭，無大分別，我呢幾年比較幾間大學嘅double E收生成績，真係嗌救命呀，與醫科生有打邊爐與打屁股之別，或者呢個就係原因囉。」
世情如此，大勢所趨，有乜辦法啫，左丁山素來信奉市場，只能相信市場會影響各類學生入大學選學系嘅決定，例如近年華爾街搶MBA畢業生漸漸輸畀矽谷，遲早香港學生都會選科技唔選環球商業啩？但香港科技界人工少一啲，又似乎唔夠吸引噃。呢個觀點就畀科學園嘅一位仁兄M打破，佢曾經對左丁山講：「你唔好迷信金融界人工一定高好多嘞，依家AI爭人爭到打崩頭，有10年AI研發經驗嘅32歲大學工科畢業生，年薪可以去到二百萬港元！」咁吃香？電腦J話係特殊個案都唔定，但IT界高度缺乏人才就係真嘅！