星期日西甲巴塞隆拿主場對伊巴，美斯喺53分鐘接應蘇亞雷斯傳送後幫球隊射成2:0，加埋阿蘇嘅兩個入波，幫巴塞以3:0大炒伊巴，喺西甲繼續排榜首。
美斯今場所入嘅一球，係佢喺西甲所入嘅第400球，令佢成為繼現時效力祖雲達斯、先後喺英超、西甲同意甲出戰507場入409球嘅基斯坦奴朗拿度（C朗）後，第2位喺歐洲五大聯賽總共至少入400球嘅球員，但淨計單一聯賽，美斯則係第1位喺歐洲五大聯賽入400球嘅球員。
31歲嘅美斯踢咗435場西甲入400球，比C朗射入400球仲快咗63場，呢位阿根廷球星喺西甲歷史射手榜嘅領先優勢亦繼續擴大，比效力皇家馬德里期間上陣292場入311球嘅C朗多89球，薩拉以251球排第3。巴塞教練華維迪賽後就咁話美斯︰「真係好驚人！佢係嚟自另一個銀河系！」