巴黎聖日耳門（PSG）上周六喺法甲雖然有前鋒尼馬缺陣，但球隊作客艾米恩斯，談笑用兵下仍然以3:0輕取對手，總算走出早前法國聯賽盃出局嘅陰霾。PSG教練杜曹今仗刻意收起尼馬，客隊上半場嘅表現乏善足陳，未能撕破主隊防線。不過，巴黎聖日耳門易邊後表現明顯有所改善，由卡雲尼、基利安麥巴比同馬昆奴斯哥利亞各入一球，以3:0輕取艾米恩斯。至於另一球王基斯坦奴朗拿度（C朗）就淨係唞得一陣，喺祖雲達斯對博洛尼亞場意大利盃，下半場先入替，不過嗰陣祖記已經贏緊2:0，而C朗亦都冇入球，最尾斑馬軍團維持贏兩球完場，晉級半準決賽，兼保持季內20場本土賽事不敗走勢，戰績係18勝2和。