苟芸慧今年為選美後入行的第十年，去年與陸漢洋結婚，卻會等四年才生B。苟姑娘表示老公原來不喜歡小朋友，但視有仔女才是女人完整人生的她，透過助養兒童計劃，讓老公作為準爸爸的實習期，最重要是老公又配合，苟姑娘對老公果然有計。
撰文：羅慧敏
攝影：林德雄
苟芸慧2009年奪得國際中華小姐冠軍，並加入香港娛樂圈，今年6月踏入第十個年頭，回顧這段日子，她說：「真係人生有幾多個十年，呢十年遇到高低、有開心有唔開心，但係睇番，覺得得着多過唔好嘅嘢，學識咗好多嘢。我覺得有時表面唔好嘅嘢，企喺另一個角度睇，就會變咗另外一樣嘢。」面對失意時，苟姑娘會選擇失憶，寧願做個開心果，「唔開心時我嘅記憶好短暫，要珍惜值得感恩嘅係開心事。」
結婚是過程
美女苟姑娘去年下嫁錫礦大王陸佑後人兼賽車手陸漢洋，問到結婚是否這十年裏最開心的時刻，她說：「結婚又唔係最開心，呢個係一個過程，當兩方ready之後就進入另一個階段，結婚嗰刻係非常開心，𠵱家大家要照顧大家嘅生活，同對方溝通，要互相改變。」大家期待他們的愛情結晶何時誕生。原來陸漢洋好抗拒小朋友，要好鍾意小朋友的苟姑娘出盡法寶，老公由不喜歡，到現時開始為爸爸做準備！
苟姑娘最近獲宣明會邀請出席親子活動，她跟老公助養了四個小朋友，「其實我十九歲嗰年已經開始助養，覺得自己可以幫人，佢哋都可以幫到我，結婚第一年，老公好似小朋友咁，佢都好驚、好抗拒做爸爸，所以我哋喺婚前已經計劃咗，三、四年之後先會生小朋友，𠵱家決定助養，希望喺過程學識點樣做爸爸，又可以幫到需要嘅小朋友，係win win嘅situation。」
老公是尊重
這個四年助養計劃，苟姑娘視為實習期，「我覺得女人有小朋友先至完整，我老公尊重我，所以努力去嘗試接受小朋友、學做一個爸爸，開頭佢對小朋友寄嚟嘅信唔會care，我當然唔會放過佢。大家睇完之後仲可以對話，例如個女話鍾意做警察，我會問佢睇法，現實生活中如果做咗爸爸會唔會表示支持，或者會好保護佢，大家會交流，嗰個過程會畀佢想像吓，等佢唔好咁驚，夫妻間又多咗話題，增加我哋之間嘅感情。」
婚後生活依然甜蜜，苟姑娘甜絲絲說：「老公好似小朋友，多咗好多拍拖時候冇嘅嘢，佢好賴皮，不過應該好多老公都係咁。」她還大爆老公姿整，外表威猛，但性格似足女人，「其實我哋兩個真係剛剛相反，大家見我覺得好小鳥依人，老公睇嚟好man、好sporty，其實佢都好多細心位，仲姿整過我，出門口等佢要等好耐，好搞笑。佢會有更多女仔嘅嘢，好多浪漫嘅諗法，佢曾經試過喺網上訂天上面嘅星星，個名係跟佢嘅姓，要做嘢嘅時候見唔到我，就話望住啲星就當見到我，佢係一個好細心、好善良嘅人，好會幫人諗，我相信佢會好識教小朋友嘅同理心。」
演員是傳遞
儍人有儍福，苟姑娘笑言有個儍心願，「呢個係一個好silly idea，我想帶多啲歡笑畀身邊嘅人同埋社會，因為我覺得香港有時會有啲唔開心嘅事，做演員嘅好處，可以透過戲劇、電影，帶出歡樂、開心嘅能量，我想將開心嘅能量傳出去，希望可以由自己做起。」
化妝：Amy Lee
髮型：Sue Cheung of Hair Corner K11
服裝提供：Max Mara
場地提供：ENVY Restaurant & Bar
更多精采時尚內容，盡在 http://add.appledaily.com。