講起服食阿士匹靈，左丁山好多朋友有此習慣，每日食一粒，不少人服80mg，香港少見，有朋友特別從加拿大買特大裝80mg阿士匹靈送畀左丁山當係隨身藥，禮物當然收下，但後來去問家庭醫生好唔好服食，醫生話：「最好與胃藥同服，阿士匹靈食得多，對個胃唔係幾好。」咁煩，費事食咯，轉送老友！
網上報導提到，2018年9月17日，權威醫學雜誌New England Journal of Medicine就曾發表澳洲學者（Monash University）John McNeil及其研究團隊嘅發現。研究隊伍在澳洲與美國搵到一萬九千人，多數係70歲以上長者，分成兩組，一半食100mg阿士匹靈，每日一片，另一半每一日食一粒placebo（安慰劑），追蹤各人服藥情況，五年之後，研究人員為兩組人員檢驗心臟病、腫瘤、失血、癡呆等病徵。比較兩組人嘅檢驗效果顯示，每日食阿士匹靈人士有較大機會出血，患上癌症，而且壽命較短！對於防止心臟病、癡呆嚟講，食阿士匹靈不會降低風險，亦唔會增加風險。
總括而言，研究人員認為對於70歲以上人士來講，每日食阿士匹靈沒有益處，只有風險。老人家食緊嘅，不妨同醫生再研究清楚。要注意，此項研究並不針對所有年齡組別進行研究，亦無針對已有心臟病人士進行研究，英文有句俗語：An aspirin a day keeps the doctor away，近年不斷受到醫學研究挑戰，食甚麼藥都要問過醫生先至好。
講番去醫院，虎媽A話在曼谷康民醫院（素坤逸路萬豪酒店附近一條橫街）好靚，不停見到滿身由黑色長袍遮蓋，只露雙眼嘅伊斯蘭女性，佢素來對時裝眼利，睇到呢大批女士孭嘅手袋，不少價值數十萬港元一個，為之咋舌。虎媽A問左丁山為何如此多中東女性在康民醫院？呢個問題左丁山以前問過，自911恐襲之後，美國對中東人入境檢查特別嚴亦不友善，於是好多中東富翁家屬就走咗去曼谷康民醫院檢查身體，一傳十，十傳百，間康民就變成中東人驗身大本營。康民每年有十萬名客人以上，好彩曼谷工人多，醫生護士（好多從美國讀醫回來）人手不缺，所以應付得來，其他投資者見獵心喜，已經開辦幾間國際級嘅驗身醫院，同康民競爭。呢啲Medical Hub生意，曾蔭權特首曾經提出過，畀梁振英特首廢咗！現在香港醫護人手短缺到極，又唔畀海外香港醫學畢業生返嚟行醫，呢啲高增值生意，拱手相讓予曼谷了。