上星期六意大利傳出一單驚人消息，當地傳媒透露，有一間香港私募基金向意甲球會國際米蘭嘅大股東蘇寧集團出價8億歐元（約72億港元）收購國際米蘭，不過據報蘇寧方面就冇乜興趣賣盤喇。
據意大利《信使報》上星期六報道，一間香港基金有興趣收購國際米蘭，雖然蘇寧老闆張近東本身冇興趣賣盤，不過對方開第一口價就已經係八億歐元，相當有誠意，所以蘇寧方面亦都將談判推遲，等張老闆認真考慮吓先。雖然未知呢單交易最後能唔能夠成事，不過意大利傳媒就指，就算國際米蘭真係再度易主，都唔可能會係短期之內完成。
印尼中國金主先後入主
國際米蘭近年多次易手，印尼富商托希爾喺2013年從前會長莫拉堤手上收購國際，三年後，蘇寧集團就用咗2.7億歐元收購咗國際嘅68.55%股份成為大股東。蘇寧集團老闆張近東仲喺上年10月委任咗佢個寶貝仔張康陽做球會主席㖭。
張康陽上年就以26歲之齡成為球會史上最後生嘅主席，不過咪以為佢一味靠父幹，佢自己都經過一番苦幹㗎。初中之後去咗美國留學嘅張康陽，畢業於美國長春藤大學之一嘅賓夕凡尼亞大學，主修經濟學。畢業後曾經喺著名投資銀行摩根士丹利打工，近年先至返屋企幫爸爸打理生意。
蘇寧3年投放32億
講番國際米蘭，其實以蘇寧集團入主後向球會投放嘅資源嚟睇，相信張近東都好有心要搞好呢間歐洲老牌球會，唔會咁輕易放手嘅。由2016年夏季轉會窗至今，國際已經喺轉會市場使咗超過3.6億歐元（約32億港元），平均每季都用過億買人，上季仲成功爭取到歐聯席位，雖然今屆歐聯分組賽俾巴塞隆拿同熱刺踢出局，不過都總算踏出咗復蘇嘅一大步，相信國際嘅球迷都希望張老闆繼續玩落去嘅。
小資料：李勇鴻收購米蘭一季玩完
其實過去歐洲球壇都出現過唔少香港資金入主球會嘅例子，不過大部份都唔算成功。其中大家最熟悉嘅一次就肯定係港商楊家誠2007年入主伯明翰，不過後來因為惹上官非被迫退股。有香港居民身份嘅中國商人李勇鴻就喺17年全資收購AC米蘭，不過一年之後就因為無力還債，俾對沖基金艾利諾集團接收球會。而一個香港財團國際娛樂亦喺上年收購韋根，不過韋根𠵱家喺英冠嘅成績亦只係一般。