溫碧霞（Irene）、吳卓羲、陳煒、郭晉安、楊怡、鍾鎮濤、陶大宇、王浩信、陳展鵬、馬德鐘同陳豪等前晚到九展出席晚宴，Irene提到上月聖誕節同家人去峇里旅行，點知Boxing Day嗰晚有賊仔入屋爆竊：「咁啱自己出咗埠，工人原先都係放假，咁啱夜晚8點工人返咗屋企，佢夜晚聽到外面有聲，見到有個男人企喺屋中間，個男人好快就走咗，工人通知我後，即刻叫佢報警，冇財物損失，只係整爛咗花園度門。好彩個賊冇揸刀或傷人，警方後來發現個賊人喺花園山坡下面挖咗個窿潛入。」
吳卓羲抹車拗柴
同場嘅吳卓羲最近同黃宗澤（Bosco）拍《飛虎之雷霆極戰》，Bosco早前拍戲傷腳，吳卓羲話Bosco腳上螺絲釘已經拎番出嚟：「佢畀咗條片我睇，見到佢好慘，逐支幾吋釘掹出嚟，仲要冇用麻醉針。因為趕開工，如果全身麻醉就開唔到工。所以做任何動作之前都要諗清諗楚。」佢仲自爆日前抹車唔小心拗柴：「做少少動作都要熱吓身先。」
另外，郭晉安同楊怡一齊受訪，楊怡話唔心急生BB：「小朋友緣份到就有㗎喇。」安仔都話：「呢啲都真係緣份嚟嘅，我嗰陣時諗住可以開心耐啲，點知就咁快，其實每一個moment都係享受，未有BB之前可以二人世界。」楊怡話𠵱家同媽咪一齊住，媽咪都好似細路仔咁要人照顧。講到佢媽咪約佢一齊買餸，但楊怡話太早，朝早七、去點去買靚嘢，佢會起唔到身。
撰文：馮仁昭