隔牆有耳：
咖喱范揮毫　民主派力撐　
野豬上馬　小心人狼 - 李八方

豬年就到，前特首梁振英日前暗示要將野豬人道毀滅嘅不人道言論，反而引起關注保護野豬，亦有人關注如果係「人狼」，喺市區遊走會唔會對市民帶嚟風險？而民主派噚日喺太子街頭，向市民拜早年派handmade揮春時，畫得一手好畫嘅新同盟范國威大展身手，大派中國風野豬畫作畀街坊，除咗一群真野豬，仲有一隻「在野的豬」民主派想力保，原來講緊嘅係盛傳會出戰油尖旺大南區補選嘅社區前進李國權。

李國權豬年擬戰大南補選

油尖旺大南選區議員經民聯莊永燦去年底去世，選舉事務處將安排該區補選，民主派估計提名期會在農曆年後舉行，換言之豬年將會正式開戰，噚日嘅街頭派揮春活動，就係李國權所屬嘅社區前進發起，民主派多名立法會議員現身撐場，群星拱照明顯為豬年該區補選先行造勢，佢哋仲借李國權有啲肉地嘅身形開玩笑，祝佢「豬到功成」，似乎希望李國權喺嚟緊嘅補選，旗開得勝。

而李國權雖然係有少少baby fat，但絕對唔係肥到豬咁，而且李國權仲幾有諗頭，佢話大南區舊私樓多，一般以為難洗樓，但係佢就發現該區好多樓都欠缺管理，甚至冇鐵閘，反而係個機會畀佢上樓同居民接觸，爭取幫樓宇管理制度化，仲借垃圾徵費殺到嚟，提高居民意識，改善大南隨處棄置垃圾嘅問題。