禮拜日亞洲盃E組嘅第二輪賽事上演大屠殺，首輪俾沙地阿拉伯大炒四球嘅北韓（白衫），今次淨吞卡塔爾（紅衫）六隻光蛋，不過由於第三名都仲有機會出線，所以北韓仲未絕望，出唔出到線就要睇禮拜五對黎巴嫩嗰場。北韓今場可以講係不設防，短短九分鐘就俾卡塔爾攻破大門，卡塔爾翼鋒艾夫左路爆落底傳中，前鋒艾摩斯阿里控定輕鬆射入，領先1:0。兩分鐘後阿里又有入波，入波模式仲一模一樣。完半場之前卡塔爾仲有中場古卡整多粒，北韓半場已經輸三粒。換邊後卡塔爾仍然唔收手，阿里分別喺55同60分鐘入波，完成大四喜嘅壯舉之餘，更加令球隊領先到去5:0。喺68分鐘左閘哈辛入波，幫卡塔爾贏到6:0完場。卡塔爾同沙地都有六分，一齊提早殺入16強。