利物浦一班名宿會喺今年4月12日，同愛爾蘭傳奇隊喺都柏林踢元老賽。呢場元老賽係為上季喺歐聯賽前俾羅馬球迷襲擊至重傷嘅紅軍粉絲Sean Cox籌款，所有收益會撥落紅軍為Sean Cox辦嘅復康基金，希望可協助呢位一度昏迷不醒嘅粉絲盡快康復。本季早前部份英超聯賽亦有為呢個基金籌款， 已籌集咗5.9萬鎊。今場波紅軍名宿、前愛爾蘭國腳麥卡迪亞九成會應邀出席。不過，佢早前喺一場六人足球賽，同另一位前紅軍隊友奧雲發生不快，麥卡迪亞仲踢咗奧雲一下，結果紅牌被逐，未知兩人會唔會再度碰頭。至於𠵱家教緊格拉斯哥流浪嘅前紅軍神奇隊長謝拉特，就未知可唔可以偷到時間返晏菲路輕鬆一下。