基斯坦奴朗拿度（C朗）涉姦案再有進展！美國前模特兒馬約爾加舊年九月入稟控告C朗，指後者2009年嗰陣喺拉斯維加斯一間酒店強姦咗佢，據《ESPN》引述《華爾街日報》報道，美國拉斯維加斯警方已經向意大利法庭發出收集C朗DNA嘅手令，希望拎嚟同喺馬約爾加條裙度發現嘅DNA做對比。
報道指，由於C朗𠵱家效力緊意甲球隊祖雲達斯，所以美國拉斯維加斯警方嘅手令係向住意大利法庭發出嘅。根據呢宗民事訴訟嘅文件，馬約爾加指控C朗喺09年6月13日，喺美國拉斯維加斯一間酒店強姦佢。佢仲指自己喺10年被迫簽署一份保密同意書，並且收咗37.5萬美元。馬約爾加目前透過訴訟，循一般傷害、特別傷害、懲罰性傷害同特別援助四方面索償，每筆賠償金額都超過50,000美元（約39.2萬港元）。
C朗一路都強烈否認有關指控，指自己係無辜嘅。佢嘅律師團隊就今次拉斯維加斯警方索取DNA樣本一事，亦再一次表明，C朗同馬約爾加當日所發生嘅事，都係「你情我願」嘅，所以就算有DNA留低都係正常不過嘅事，證明唔到啲咩咁話。