政圈最近再有風聲傳出，現任經民聯地產界議員石禮謙明年改選將會退位讓賢，上屆已傳過會出戰嘅富商趙世曾之子、自由黨發展及建造業關注組召集人趙式浩（Howard）係潛在人選，「咁啱」佢噚日親自領軍，帶隊到政總外請願，向政府反對收緊差餉寬減，連行會成員張宇人都做「啦啦隊」。八方問過Howard，佢話現階段都唔諗選舉住，因為自己都好忙，至於爸爸趙世曾撐唔撐佢選？佢笑指自己做乜爸爸都好支持，但都係嗰句：「未諗住啊！」
傳大嚿石明年交棒
咁石禮謙又係咪要退落來？大嚿石同八方講，自己係天主教徒，不會為明天憂慮，即係未講明退唔退，但又話歡迎業界有後生仔參選，仲話Howard都係佢「徒弟」，不過佢就話自己大把「徒弟」，仲點名話立法會主席梁君彥嘅公子梁宏正（Clarence）都係徒弟仔，對方係麗新（集團）非執董，唔通暗示佢都有資格選地產界？其實趙式浩同梁宏正兩人無論年齡、學歷、家境、事業以至內地人脈等都不相伯仲，明年若然大嚿石「真」退，地產界代表議席唔只富二代之爭咁簡單，仲係自由黨同經民聯大鬥法。