禮拜四亞洲盃A組比賽，首輪以1:4慘輸印度嘅泰國翻生，喺日職搵食嘅「泰國美斯」猜拿迪普桑格辛攻入全場唯一一球，以1:0贏咗巴林打開勝門，分組賽暫時攞到1勝1負。巴林上輪對主辦國阿聯酋踢出水準，而泰國第一場就慘負印度1:4，之後仲炒埋教練拉耶華治，結果今場亦都變身。29分鐘，巴林中場馬漢喺左路快放，之後起腳勁射近柱，但因為來勢太急加埋係彈地波，泰國門將迪辛洛安只能夠勉強拍出化解危機，半場兩隊冇交收。換邊後嘅泰國脫胎換骨，58分鐘成功打破僵局，右翼衞查斯坦多趕喺巴林守將攔截前傳中，後上嘅猜拿迪普桑格辛第一時間撞射入網，泰國領先1:0。72分鐘佢哋又有黃金機會，前鋒格賴頌喺冇人睇嘅情況下竟然射中柱，浪費大好機會。雖然格賴頌失機，但都阻唔到泰國贏波。