中超球會天津權健集團早前涉嫌組織、領導傳銷活動罪同虛假廣告罪，被內地公安機關立案調查，並喺禮拜一將集團老闆束昱輝等18人拘捕，連天津權健隊波都被傳會由天津足協接管。
老闆唔掂，睇怕難免會出現球員逃亡潮，其中兩名外援韋素同埋莫迪斯迪已經先後跳船，剩番巴西前鋒柏圖。曾經表示對內地女星迪麗熱巴好傾慕嘅柏圖，一旦要離開中國難免更難接近佳人，不過佢心情似乎就冇受影響，事關最近有傳佢喺祖家巴西搭上咗百億身家富豪個女，認真識玩。
權健被接管或重返米蘭
隨住天津權健傳被內地當局接管，陣中最著名嘅巴西籍球星柏圖，好大機會離開中超，有傳下一目的地係重返曾效力過嘅意甲AC米蘭。柏圖喺效力權健嘅兩年間，一直公開力追內地維吾爾族影星迪麗熱巴，更曾喺球場上高舉對方嘅相，惟女方嘅發言人回應話：「迪麗熱巴對足球唔太了解。」可謂一刀刺入柏圖嘅心窩。
雖然喺內地追求迪麗熱巴不果，不過作為巴西著名球星、𠵱家29歲嘅柏圖依然好有市場，而且似乎仲係無寶不落。最近有巴西傳媒踢爆，柏圖喺上年年底中超煞科後返咗巴西，同一位大佢近10年、38歲嘅巴西電視節目主持麗貝卡搭上，佢哋唔單止被拍攝到出入戲院，仲一齊歡度新年，被認定係柏圖嘅新女友。
專吼姐姐 新女身家180億
更令人驚訝嘅係，麗貝卡爸爸係身家多達23億美元（約180億港元）嘅巴西富翁施維奧山度士，佢任職嘅電視台其實都係佢爸爸嘅。麗貝卡曾經結過兩次婚，首任丈夫係巴西金融大亨之子；第二任丈夫係政府高官，最終都離婚收場。
身家豐唔豐厚似乎都係柏圖嘅擇偶條件。佢喺五年前就曾經同AC米蘭前主席、傳媒大亨貝盧斯科尼嘅女芭芭拉拍拖，但其間曾被爆出同一名巴西電視台女主持漫步沙灘，被指一腳踏兩船嘅柏圖最終同大五年嘅芭芭拉分手，而事件中嘅「小三」，竟然係柏圖目前新女友麗貝卡嘅親姐姐！箇中關係非常混亂。柏圖追富家女嘅功力，肯定好過佢現時喺足球場上嘅表現。