電單車有名你叫「皮包鐵」，好似北大嶼山公路呢位「華Dee」，俾的士撞到跌落地連打幾個觔斗，好彩後面嘅車煞得切掣，唔係隨時變肉醬。
的士司機李先生，噚日朝早7點幾，載客去機場，沿北大嶼山公路中線行駛，過咗小蠔灣車廠冇耐，右邊突然有架電單車切線爬頭，李生話，電單車當時無打燈，車速好快，連超幾架車，當駛到一架的士旁，架的士咁啱由中線切到去快線，將電單車撞倒，鐵騎士跌落地，喺馬路上連打幾個觔斗，電單車繼續向前滑咗約100米先停低，尾隨私家車司機反應快，即刻抽去中線，李先生亦都馬上減速，認為鐵騎士責任最大，「淨快線切去中線已經唔啱，抽嚟抽去，仲行得咁快！」
警方回應指，姓梁（44歲）電單車司機，及姓郭（58歲）的士司機事後通過酒精呼氣測試，電單車司機腳部受傷需送院。