求驗客手記:鳳凰驚險收「悉」七場不敗

求驗客手記:鳳凰驚險收「悉」七場不敗

近三季澳職經常喺下游嘅威靈頓鳳凰,今季走勢算比較穩定,星期二就靠基舒拿梅開二度,作客險勝西悉尼流浪者3:2,連續七場不敗。鳳凰今場36分鐘由路爾斯芬頓先開紀錄,但六分鐘後就俾對方中堅班頓咸美爾藉角球扳平,半場1:1返更衣室。換邊後82分鐘,鳳凰首席射手基舒拿就顯出功架,扭過對方門將射入,只不過西悉兩分鐘後又靠角球再次追平。結果去到89分鐘,基舒拿再做功臣,近門頂入佢今場波個人嘅第二球,幫鳳凰全取三分。