噚日朝早10點幾，荃灣關門口街人稱熊貓酒店嘅悅來酒店對開，有一條地底水管突然爆咗，湧晒啲黃泥水上馬路同行人路，有車輛啱啱轉彎駛到嚟都要慢慢行，途人都行埋一邊避開黃泥水，但部份人被迫要澗水行。地底大量泥土沖散咗，導致路陷，面積大約三米乘三米。
警方接報到場封鎖受影響路段，即係悅來酒店對開關門口街往楊屋道方向全線，行經嗰段路嘅巴士線要改行第二度，交通警喺現場幫手指揮交通。警方同時通知水務署派人閂水掣同埋到場搶修。冇幾耐水務署嘅工人已經到場清理沙泥，現場有一部挖泥機同吊臂斗車幫手。
水務署發言人話有一條10吋直徑嘅地底食水管爆裂，署方人員已經即時閂水掣同埋做緊急維修，事件冇影響食水供應，預計維修工作今朝早會完成。