曼聯自看守領隊蘇斯克查上任後拎咗五連勝，最近仲去咗天氣和暖嘅杜拜集訓，等蘇B同一眾魔將更加親近。至於因傷冇隨隊去杜拜集訓嘅保羅普巴，佢嘅大佬馬迪亞普巴，就話普巴之前踢得差都係因為摩連奴，鬧爆摩佬成日想做焦點，不過𠵱家普巴經已翻生，英媒仲爆料話蘇B對攻擊球員嘅指引，只係要佢哋展現自己嘅風格，可以踢得自由同唔使咁多防守，同摩佬嘅鐵腕管理明顯唔同。
而陣中中場費特洛迪古斯因要照顧大肚嘅老婆，唔使隨隊去杜拜，可以留低喺曼市同老婆拍拖，亦睇得出蘇B幾為球員着想，難怪有傳蘇B好受陣中球星歡迎，想佢坐正做領隊㖭！至於被炒冇幾耐嘅摩佬，至今都冇關於佢準備重出江湖嘅消息，不過近日賓菲加主席菲臘比韋亞拿接受訪問時就率先開口，表示有意邀請摩佬回巢：「如果摩佬同我講佢願意嚟賓菲加嘅話，我哋可以即刻將佢帶過嚟，對賓菲加嚟講，錢唔係問題！」