幾年前港產電影《十年》，寫出中港關係激流暗湧，唔知𠵱家年輕一代又點睇中國政權？今年係六四30周年，支聯會頭炮活動就係同教協舉辦首個短片比賽，作品唔一定要講六四，而係想了解年輕人對國情、中港關係睇法，講明創作無界限，唔涉及誹謗、侵權等違法前提下，拍片探討港獨都冇問題。
紀念館新址月尾收鎖匙
支聯會副主席蔡耀昌話，過去一段時間大家好關注點同年輕一代有更多互動，可以一齊討論六四、國情、香港未來等，所以推出「國情。香港。未來」短片比賽。比賽分大專組、中學組，冠軍分別可得1萬蚊同5,000蚊獎金，各組除冠亞季軍外，仲有五名優異獎同一名網上最受歡迎獎。
常委盧偉明提到比賽評審有金馬獎導演應亮、國情專家呂秉權、新任常委90後黃雅文、80後立法會議員鄺俊宇等等。2月開始會有四個工作坊，其中3月2日由陳健民主講，「（佔中案）4月9號會有判決，變咗係佢民間最後一課」。蔡指今次比賽最重要為內容方面，用手機拍攝亦可，鼓勵參賽者拍出點睇國情同香港未來，「可能講兩國兩制，甚至一國一制都未定」。
至於六四紀念館新址都有進展，預計月內簽約同交100萬首期，月尾交收鎖匙，過年後裝修，到年中前支付所有餘額。