黃心美早前上載多張跟男友的拖手照，但男友樣貌保密，近日男友才被揭是大生銀行後人、馬清偉與薛芷倫所生的大仔馬桂烽，有報道更指這段姊弟戀好事近。黃心美昨日到旺角為發佈會任司儀，對於有關男友的提問都表現緊張，更求求大家放過她。
𠵱家好開心
問到男友被起底，黃心美說：「我一直公開有拍拖，覺得安全感唔只女仔需要，要畀埋另一半，佢係圈外人，一路唔想影響佢嘅工作同生活。」她自言拍拖沒有壓力：「拍拖係正常，光明正大，唔係偷、唔係搶，唔係做犯法嘢。」再問拍拖多久、兩人怎樣認識、是否已經見家長？黃心美一概表示：「唔答，兩個人嘅事自己知就夠，做呢行好多時都已經翻開肚皮。」是否想保護戀情？她坦言：「我覺得係咪做呢行，都需要保護感情。」
提到36歲的黃心美比男友年長十年，兩人溝通時會否有隔膜，黃心美認為沒有問題：「我覺得拍拖最重要係開心、舒服，關係係一對一，其他唔重要，我𠵱家好開心。」記者笑她快將成為百億新抱，她指結婚事隨緣：「從來相信天會有好好安排。」
搵教練健身
之前有過一段四年半婚姻，黃心美表示仍然相信婚姻，再問如果現時結婚，對男友來說會否太年輕？她說：「隨緣，個個都有自己嘅時間表。」至於男友有何吸引之處，她大讚男友：「另一半非常孝順父母、愛錫小動物、心地善良、對我好好。」與舊經理人公司約滿，回復自由身，黃心美表示會爭取時間增值自己，有意找個私人教練來鍛煉身體。
採訪：羅慧敏
攝影：陳俊強