利物浦喺星期一嘅英足盃第三圈賽事，作客以1:2不敵狼隊無緣晉級，連續四季英足盃俾W字頭嘅球隊踢出局，更加弊嘅係紅軍後衞洛夫雲今場傷出，球隊中堅進一步鬧兵荒，領隊高路普今次真係頭痕喇。
上星期俾曼城打破今季聯賽不敗身嘅利物浦，喺對狼隊嘅英足盃一共作出九個調動，只有洛夫雲同占士米拿繼續正選，點知呢兩位球員就雙雙出事。其中洛夫雲開賽六分鐘就因為大腿受傷要退下火線，由年僅16歲嘅小將賀化入替，成為紅軍英足盃歷來最年輕上陣球員。去到38分鐘，占士米拿就因為喺中場控失，俾狼隊嘅魯爾占美尼斯推足半場後喺禁區射入遠柱開紀錄。
洛夫雲傷埋得VVD頂住
雖然51分鐘利物浦靠奧歷治禁區頂射入靚波扳平，不過4分鐘之後狼隊嘅魯賓尼維斯喺30碼外回敬一球冷箭再次領先。紅軍原本有機會再一次追平，不過梳頓沙基利69分鐘主射罰球中內柱彈出，最後輸1:2出局。今次係利記喺高路普執教後，連續第4季過唔到英足盃第4圈，今次第3圈出局仲係紅軍2011年以嚟最早出局嘅一次。雖然唔知高路普迷唔迷信，不過有啲嘢就真係好邪，原來高路普呢四次喺足總盃，同樣輸畀W字頭嘅球隊，包括15/16球季嘅韋斯咸（West Ham）、16/17球季同今季嘅狼隊（Wolves）同上季嘅西布朗（West Bromwich）。
高路普賽後就話，今場作出輪換係逼於無奈：「經過之前嘅頻密賽程後，好多球員都有輕傷或者需要休息。我哋之前三場比賽嘅陣容都幾乎一樣，所以必須輪換。」隨住洛夫雲傷腿筋，利物浦得番華基爾雲迪積克一位健康嘅中堅，預料紅軍喺星期六作客白禮頓嘅聯賽，要防中法賓奴泰華利斯好似今場咁客串中堅，而16歲嘅賀化都應該繼續喺後備席。紅軍今場打正選嘅另外兩位小將，右閘拉菲爾甘馬曹同埋中場居迪斯鍾斯都好受高路普睇重，睇吓佢哋可唔可以把握機會喇。
槍手32強硬撼紅魔
至於英足盃第四圈抽籤都已經出爐（見附表），衞冕嘅車路士抽到好籤，對手係英冠嘅錫周三或者英甲盧頓嘅勝方，而32強最重量級戲碼，就係13次英足盃冠軍阿仙奴主場硬撼12屆盟主曼聯，第4圈賽事會喺今個月嘅25至28日進行。