喺中美貿易戰停火90日限期剩返53日之際，雙方終於喺本周一埋枱談判。中美擺和頭酒，中港股市周一分別衝高0.7%同0.8%。
相對貿談，其實聯儲局放慢收水同人行放水，對市場更具刺激。不過，央行幣策轉鬆嘅背後，係經濟走下坡，雖然放鬆銀根可以紓緩企業資金壓力，但股市能否持續上升仍然取決於整體經濟狀況。大市現時只屬技術性反彈，反彈之勢能否持續成疑。
講到經濟，90年前，大蕭條揭開序幕，斯姆特—霍利關稅法案（The Smoot-Hawley Tariff Act），就係導致美歐貿易規模由1929年高峯跌至1932年低谷嘅催化劑。現時，美中關稅互片，最驚歷史重演。聯儲局前主席格林斯潘日前就預警，美國將會陷入滯脹，提醒股民避險。
不過，經濟唔掂，反而倒逼美國同中國喺貿談上鬆章、喺幣策上鬆手。股市見熊之後，更出現入市訊號。美銀美林衡量市場人氣嘅「牛市和熊市」指標已跌至1.8「極端熊市」水平，觸發股市買入訊號，係2016年6月英國脫歐公投導致全球市場螺旋式下跌以嚟首見。
股市提早反映經濟前景，若果股市築底，估計經濟亦離底不遠，想炒否極泰來，可以伺機部署建倉。不過，當前股市基本面甚為複雜，中美貿談未必有實質消息，現價趕搭順風車，隨時變搭過山車。股市築底往往唔係一氣呵成，通常反覆波動，資金要作合理分配，分注吸納。
由於近排投資情緒同資金流向都好波動，揀股宜揀具防守性嘅高息股，或索性買指數基金如盈富（2800），比較穩陣。盈富係追蹤恒指嘅指數基金，2011年以嚟，恒指市盈率大致喺8倍至12倍上落，喺10倍或以下收集贏面較大，現時則為10.7倍，不妨等吓。
割柑人
本欄逢周二刊出