前日嘅鄉郊代表選舉，那邊廂有打鼓嶺坪洋村陳金華、陳崇輝父子相爭，老竇鬧爆阿仔非常之忤逆，結果拉咗個仔落馬，自己做村長；這邊廂沙田鄉事委員會下禾輋村黃裕財，同佢個社民連副主席嘅囝囝黃浩銘就父子同心，結果其利斷金，黃裕財喺囝囝黃浩銘協助之下，成功連任居民代表，仲要由上屆六票之差，拉闊到領先38票，以78比40票高票當選，都咪話唔高興！
近年阿銘因為社會抗爭，屢屢成為新聞人物，不斷經歷上庭、判刑、鋃鐺入獄嘅佢，肯肯定會俾鄉親父老、叔伯兄弟視為「搞搞震」人物，八方問過阿銘，佢都話當初曾經好擔心，驚自己會影響爸爸選情，幸好事實證明選民懂得分是非黑白，「識分做嘢嘅人，同唔同意我係另一回事」。
司馬文慘敗而回
其實佢哋兩仔爺喺村入面可以話係拍住上，村內村外都「搞搞震」嘅阿銘，形容自己只係爸爸嘅小幫手，但佢建議爸爸將做過嘅嘢多啲向村民滙報、成立村委會，提高村民對村內事務嘅參與度，確實係獲得村民受落，當然做啲乜嘢同做到啲乜嘢都係爸爸嘅功勞，實在係實至名歸。至於佢哋點樣慶祝呢？阿銘就話前晚公佈結果都已經10點幾，只係簡單食個飯就返屋企休息喇，不過阿銘喺fb上載咗佢同爸爸嘅自拍合照，佢爸爸手上仲揸住紮花㖭！
選舉當然有人歡喜有人愁，早前同立法會議員朱凱廸發起《綠色鄉村約章》嘅南區區議員司馬文，首次參選西貢坑口檳榔灣居民代表選舉，結果只得12票慘敗，輸獲得110票嘅對手劉運明98票。
李八方
