粉嶺和滿街聯和墟街市有檔主噚日朝早6點幾返嚟開檔，發現櫃枱有俾人搜掠過嘅痕迹，懷疑有人爆竊，於是通知保安員報警。之後其他檔口陸續有職員返工，發現都有同樣情況，合共有九個檔口懷疑遭爆竊，當中大部份係海鮮檔，有啲係肉檔。
警員接報去街巿調查，職員初步發現檔口主要損失找續用嘅散銀，總值就要慢慢計喇。現場有檔口安裝咗幾個閉路電視鏡頭，影住唔同角度，從片段睇到，噚日凌晨零時左右，有一個戴口罩遮臉嘅男人，着風褸同深色褲，踢人字拖出現喺畫面，佢喺唔同檔口外面徘徊咗一陣，然後逐個檔口搜刮，其間擒高擒低，喺枱底捐嚟捐去，又打開櫃桶左摷右摷。
其中一條片段仲影到口罩男換咗對水鞋，企上海鮮檔嘅檔口枱面搜掠，佢喺街巿逗留咗接近兩個鐘先離開。警方追緝緊呢個賊人下落。