林鄭月娥（圖）接受香港開電視《開嚟見我》節目嘅訪問噚晚出街，八方都有坐低睇吓佢有乜嘢開嚟見大家，之前電視台已出晒新聞稿，詳細介紹訪問內容，八方以為個節目出街嘅內容應該講晒，點知噚晚一睇竟然有「驚喜」，其實應該話「驚嚇」先啱，因為林鄭竟然「預言」香港將來唔知仲有冇律師！唔通好似大陸大抓捕律師嘅事情，就快殺到嚟香港？
明日大嶼改名「堅尼地城+」
其實前日香港開電視為訪問發新聞稿，有提到娥特被問到面對香港未來發展，家長同子女應該如何迎接「明日香港」？新聞稿話娥特呼籲家長唔好畀子女太大壓力，要畀小朋友「發白日夢」，唔好逼仔女做呢樣、做嗰樣，但點知原來娥特講嘢仲有下文，佢講到呢度突然爆出一句「逼佢讀法律，第日仲有冇律師？」八方聽到個心都離一離，唔通娥特近排睇得內地維權律師新聞多，唔覺意講咗真心話？定係佢對班大狀、特別係大狀黨好有意見，所以唔覺意真情流露？
除咗講湊仔經，娥特都有提吓佢嘅倒錢大計「明日大嶼」填海計劃啦，佢話明日大嶼就唔會搞創科嘅，要發展成第三個核心商業區，因為呢個人工島地理位置無得彈，勁近中西區，娥特笑言有人向佢建議明日大嶼一於改名「堅尼地城+」。乜好好笑咩？講到個島起硬咁，有冇問過香港人先？