現年43歲嘅尹子維同有「中國第一美胸」之稱嘅28歲女星徐冬冬，前日手拖手現身北京機場，令戀情曝光。素顏嘅徐冬冬戴黑超同口罩遮樣，一直如小鳥依人蹺實男友，尹子維就未有戴口罩，亦冇戴帽，相當大方。之後佢哋發現有傳媒追訪，徐冬冬即雙手合十，表現有禮。
做過晶女郎
擁有35E上圍嘅徐冬冬，有朝鮮族血統，當年喺北京師範大學心理系碩士畢業後，主要以拍攝性感寫真為主，直到接拍內地網劇《餘罪》後，獲導演王晶賞識簽約成為旗下「晶女郎」。其實徐冬冬演出過唔少香港電影，當中就同周潤發合作《賭城風雲III》，喺片中飾演骰后，又參與甄子丹同劉德華主演嘅《追龍》，戲中飾演性感殺手。
徐冬冬喺唔少電影入面都有展示一下驕人身材，上年喺香港上映嘅內地電影《西紅市首富》，就演勾引男主角嘅骨妹。徐冬冬亦拍過唔少劇集，包括𠵱家播緊嘅《守護神之保險調查》，同之前播出嘅《冒險王衛斯理之藍血人》。
公開讚男友
其實喺上年11月，徐冬冬已經喺微博宣佈拍拖：「戀愛了，他是一個簡單的普通人，他會做酸辣土豆絲和西紅柿炒雞蛋，他有一顆美好的心，他支持我，他強烈不希望我公開他，他怕我本來粉絲就不多，最後粉絲全部掉光。」但當時徐冬冬未有公開男友身份。
外形花弗嘅尹子維，過往同貝安琪、劉美君，仲有楊淇都傳過緋聞。近年尹子維轉戰內地，喺北京開製作公司，前年佢就因為同徐冬冬喺電影《合約男女》演情侶，佢哋喺片中又有火辣親熱戲，估計因拍戲而拍出真感情。
撰文：馮仁昭