星期日英足盃，啱啱贏咗利物浦嘅曼城，喺主場強陣出擊，憑史達寧、加比爾捷西斯、馬列斯、利萊辛尼等人齊齊「士哥」，大勝英冠球隊洛達咸7:0，晉級第四圈。
開波12分鐘，今場復任正選兼做隊長嘅奇雲迪布尼，禁區頂直接妙傳畀史達寧破網，幫曼城領先1:0。到完半場前兩分鐘，根度簡助攻小將菲爾科頓撞入，加埋洛達咸守將阿積爾喺補時階段嘅烏龍波，令藍月半場領先三球。下半場53分鐘，史達寧傳中畀加比爾捷西斯近門掃入；73分鐘，馬列斯殺入禁區破網；78分鐘，中堅奧達文迪角球頭槌建功；85分鐘，後備上陣嘅利萊辛尼喺禁區頂勁射得手，幫曼城派足七蛋畀洛達咸。
另一支英超球隊李斯特城，同日作客英乙球隊紐波特郡就爆冷輸1:2出局。紐波特郡喺開波10分鐘由麥特建功，半場領先李斯特城1:0。李斯特城要等到82分鐘先由拉治迪基素爾追成1:1，但係三分鐘後，馬克艾拜頓喺禁區內犯手球，李城被罰12碼，紐波特郡由阿蒙操刀射入，李城爆冷輸1:2出局。
