葉先生上周五下晝近4點搭行走上水至香港站嘅673號線九巴過海，趕住去上環交文件，點知遇着一個私家車司機玩嘢，喺巴士前面突然加速後煞車，搞到巴士幾次急停，巴士車長最後要停車報警。
事源巴士沿慢線準備駛入東區海底隧道，一架紅色私家車切線爬頭，巴士車長要急煞，於是車長閃車頭燈同響按示警。跟住行喺巴士前面嘅私家車喺隧道入面三、四次加速，然後又突然煞車，令到巴士要跟住煞車。出隧道之後私家車喺東廊橋面斷續煞車，然後仲突然停車㖭。
巴士車長報警，葉先生話巴士有乘客落車鬧個私家車司機咁揸車好危險，對方態度輕佻，只話唔好意思。葉先生都有鬧埋一份：「你係就投訴個巴士司機，唔係搞到成車人停喺度同你玩嘅！」
警察嚟到，41歲私家車司機話39歲車長開車頭燈影響到佢。警方話兩個司機互相投訴對方駕駛態度有問題，將案列做交通投訴處理。巴士最後耽誤咗半個鐘，乘客要轉搭下一班嚟到嘅巴士，葉先生最後遲到，要央求人哋通融先交到文件咋！