【寵愛生命】
養老虎狗，需要大量時間、金錢和最重要的愛心，上一個熱潮係《阿笨與阿占》，今有《大帥哥》，看到「少帥」如此可愛，你又心思思想養？專救老虎狗的「Bulldog Rescue Team」創辦人說：「因為個樣太可愛，好多人見到就想買嚟養，但同時又太難養，所以老虎狗係棄養熱門。」
老虎狗樣子呆呆笨笨，的確可愛，所以是本地繁殖場熱門狗種，越多人買，越多人繁殖，惡性循環，但監管不足往往令繁殖場狗狗不見天日，過着生不如死的生活，可以領養代替購買，大愛不選品種，領養救動物，當然功德無量，就算堅持愛老虎狗，都可以留意各大寵物領養平台，例如「寵物國度」，老闆兼老虎狗主翠兒說：「我哋當然唔希望見到有棄養，但的確耐唔耐就會有老虎狗被棄養，我哋會暫養之後幫佢哋出領養post，呢度好多狗主都係透過我哋領養老虎狗嘅。」
患心臟病 「醫咗十幾萬」
「香港潮濕又熱，無論係今次喺電視睇到嘅英國老虎狗，或者法國老虎狗，都唔太適合，因為鼻短，平常呼吸都可能好辛苦，要長期開冷氣。而且唔可以喺戶外太耐，會氣喘。」翠兒說除氣管問題外，關節問題都嚴重，「佢哋腳短、身體重，椎間盤移位都好常見，行路會側埋一邊甚至行唔到，7、8歲就可能會有髖關節問題。另外是皮膚問題，佢哋體味係比較重嘅，而且皮膚好多摺位，要成日清潔。呢種狗打麻醉針都好大風險，所以獸醫都建議，除非攸關生死，否則盡量都唔好麻醉做手術或洗牙。」還未怕？還有：「最麻煩係有心臟病，醫療費會好貴，我隻C老闆喺2012年就差啲走咗，醫咗成十幾萬先救得番。」所以不要一時衝動及貪可愛而養老虎狗，「近排節日多，希望大家唔好當一條生命係禮物，之後發現原來喘氣咁勁呀？咁多口水呀？體味又重？因為老虎狗遺棄情況好嚴重。」
有很多寵物主人，起初也是付錢買寵物的，但之後對業界了解更多，對動物的愛亦越來越深，決定不再買貓狗。出過很多老虎狗領養post、Bulldog Rescue Team的創辦人Shelia及Dorothy說：「我哋個會係由幾個養開老虎狗嘅狗主認識開始，因為老虎狗幾難養，所以好多話題，又會一齊放狗。之後因緣際會下認識到翠兒，佢畀好大支持我哋，免費提供地方暫養、糧食，又有人照顧，所以我哋見到有人棄養就會接番嚟，繁殖場唔要又會救番嚟放喺呢度先，再出領養post。」長期和老虎狗相處，原來不是天生基因問題，還有性格也特別需要關注，「佢哋好硬頸，好黐人，所以如果你唔係諗住放工就陪佢，或者冇預好多時間照顧，真係要諗清楚。又所以我哋畀人領養前都會去做家訪，都係為隻狗好。」
「好多狗主見過繁殖場救出嚟嘅老虎狗，之後都唔會再買動物，唔想助長一啲無良嘅繁殖場。因為好多喺繁殖場救出嚟嘅老虎狗，情況真係好差，個身又爛晒，有啲又長期困籠導致腳有問題行唔到。」翠兒說得輕鬆，但原來也看過不輕鬆的個案，「好似寶寶咁，救出嚟時幾個月大，長期喺貨櫃入面不見天日，你想像吓長期喺一個又黑又污糟嘅地方，活動空間又得個籠……當時佢好驚人，慢慢餵佢，摸多啲佢先好啲，被Simon收養之後，感受到愛，好黐人喇。」
拯救生命 領養代購買
訪問當日很多老虎狗家庭到場，其中有隻坐車仔進來，叫Daisy，原來行動不太好。「家陣已經好咗好多喇，散步行到5至10分鐘。」原來主人阿智領養Daisy時，牠已經9歲，而且又唔係好行到，「兩三年前搬屋，好想養老虎狗，覺得佢哋好可愛，之後做資料搜集，了解到老虎狗好多病痛。喺呢個時候就好巧合喺寵物國度見到Dasiy，知道佢被前主人虐待，又打又踢搞到佢唔敢返屋企，救咗出嚟之後搵新主人。咁當然好多人都話養寵物梗係想由細養起啦，但生老病死係人同狗都必經嘅，老咗都想要屋企人嘛，唔通老嘅就唔可以得到人愛？見到佢好可憐，知道佢已經9歲，考慮過有心理準備，就決定帶佢返屋企，希望畀個地方佢養老。」
領養之後，阿智更加沒有後悔，「原來佢都冇放棄自己喎，前主人係放養嘅，一返嚟周圍屙屎屙尿，但9歲嘅佢都可以重新學識在家大小便。」現在Daisy減了約10kg得26kg重，輕了健康了亦行得好了。「醫療費都要㗎，不過既然養狗一定要使錢，不如拎買寵物嘅錢去幫有需要嘅狗狗，醫好佢再養佢，都開心喎。」
就算你好理性兼追求經濟效益，聽到這裏，可以養寵物又可以救到一條生命，應該都會明白領養代替購買這回事，的確是win win有着數。
從新加坡來港的Simon，領養了身世可憐的寶寶(右)，另一隻BB則是他從新加坡帶回來的。證明移民並非棄養藉口。
3歲狗狗叫啲啲，主人Denis：「養老虎狗係難嘅，長期要冷氣，又怕突發性心臟病。」
翠兒的C老闆也是棄養狗狗：「2009年10月，有個主人嚟話要暫託，因為出差幾個月，畀咗兩個月錢之後就話唔要。」
4歲Boss疑因舊主人要生BB而遭棄養，新主人Cherry說：「消息係喺網上群組『虎頭幫』睇到嘅。」
採訪：陳孝義
攝影：徐振國