維拉利爾憑中場辛迪卡索拉梅開二度，喺禮拜四西甲主場以2:2逼和皇家馬德里。「黃色潛艇」接戰四分鐘就有辛迪卡索拉喺禁區內右腳熨射遠柱入網，不過「銀河艦隊」好快由賓施馬同埋華拉尼嘅入波反超前2:1。直至完場前八分鐘，卡索拉遠柱頭槌破門，助黃潛追和搶得一分，暫以17戰得16分跳出降班區域。