聖誕新年期間，唔少讀者都應該有出外遊吓埠，唔知大家又有冇去過葡萄牙嘅馬德拉島呢？呢個島係葡萄牙球星基斯坦奴朗拿度（C朗）嘅家鄉，而家鄉亦專登豎立咗一座C朗嘅全身銅像，仲成為咗當地嘅名勝。只不過，好多遊客影相個陣都唔係好規矩，仲要摸住C朗嘅重要部位嚟合照，搞到呢個敏感部位寧舍「立立令」。
坐直升機遊杜拜
C朗嘅銅像喺14年開始豎立喺馬德拉島，銅像高3.4米，重800磅。不過對遊客嚟講，呢啲一概都唔係重點，最緊要銅像可以呈現C朗健碩嘅身形，令到唔少遊客都忍唔住上下其手，邊摸住「小C朗」所在嘅位置邊影相。四年過去，C朗銅像嘅重要部位因為成日都俾人摸嘅關係，捽到呢個位置啲色水有啲唔同，令到「小C朗」越嚟越礙眼。同日前叱咤頒獎禮樂隊Dear Jane主音阿Tim身穿皮褲激凸有過之而無不及，恐怕將來會吸引更多遊客慕名而來，欣賞C朗雄偉嘅一面。
而C朗本人都開始佢嘅年假，呢位上半季意甲全勤嘅最佳員工，最近就同屋企人一齊去咗溫暖嘅杜拜度假，佢仲喺坐直升機遊覽杜拜景色嗰陣開ig live，同球迷互動一番，與眾同樂。
美斯放完假黑面
相對於啱啱先開始放假嘅C朗，另一位球王美斯就已經放完假，飛返巴塞隆拿準備下個禮拜日對基達菲嘅西甲比賽。美斯同屋企人喺聖誕期間就返咗老家阿根廷嘅羅沙里奧度假，為咗慶祝新一年，球王仲變身舞王，同太太安東莉娜一齊喺泳池邊跳舞，非常享受假期。但開心嘅時間過得特別快，周三美斯已經俾傳媒影到出現喺巴塞隆拿機場，放完假面色當然都唔係幾好，不過遇到球迷要求簽名同埋自拍，佢都叫冇托手踭。
