前排大館請完又禁、禁完又請中國流亡作家馬建件事，中西區區議員民主黨許智峯噚日喺區會提出動議，要求馬會保障言論及創作自由，但係建制派騎劫個議案，變成講反港獨，不過民主黨區議員即時寸民記，無端端又提港獨，係咪想變相提醒港獨派去大館搞活動？點對得住中央？
許智峯提出嘅動議係話，對馬會一度取消馬建嘅場地，做法涉政治審查同限制言論自由，對此表示遺憾，要求發展局責成馬會確保大館運作保障言論及創作自由。點知民記楊開永提修訂，係動議加入要馬會「防止大館設施被濫用作宣揚港獨的活動」。
民主黨鄭麗琼好言相勸民記，原本冇人諗住喺大館搞港獨，民記咁搞容乜易真係有人去搞？民主黨吳兆康不停追問楊開永，無端端講港獨對唔對得住中國、對唔對得住中國香港、對唔對得住特區？
楊開永淨係識話大家同意咪支持佢個修訂，唔同意咪唔支持囉！黨友楊學明話提出反港獨嘅修訂都係言論自由。其實提反港獨的確係言論自由，但提港獨何嘗不是？只有真正搞唔清港獨同言論自由嘅人，先會喺整件本來同港獨無關嘅事上，非常此地無銀咁提反港獨啫。而最後憑人數多佔優嘅建制派當然贏咗，但係咪有道理呢？