有「吹神」之稱嘅陳奕迅（Eason），一家三口喺聖誕節連同梁朝偉、劉嘉玲等人去咗日本滑雪，共敍天倫緊要過攞獎。噚日喺微博就瘋傳Eason一家三口嘅相，原來佢哋喺日本機場俾網民野生捕獲，聽講Eason可能唔太舒服，又或者唔想俾人認出，所以全程都見佢戴住口罩。當有人認出佢影相，Eason雖然露出好無奈嘅眼神，但都肯停低任影，頗為親民。至於太太徐濠縈同囡囡康堤都冇迴避鏡頭，康堤仲笑笑口。睇番啲相，今年14歲嘅康堤已經高過媽咪，遺傳晒父母嘅優良基因，搞到網民都忍唔住大讚康堤百分之一百清純。
看淡獎項
其實，Eason去年喺樂壇都非常活躍，除咗推出新專輯《L.O.V.E.》之外，又喺中環舉行一場慈善音樂會，Eason話：「因為我應承咗要回饋番香港。」可能因為佢嘅心係希望做多啲呢類有意義、或者自己真係好想做嘅事。獎項呢類就變得過眼雲煙，佢已經唔會太強求，所以冇現身任何頒獎禮，搞到有唔少fans都話要公開尋人。
撰文：馮仁昭