中國講人權，往往得個笑字，淨係打壓維權律師，拉上法庭秘密審訊，不准家人聽審等事，已貽笑國際。最新嘅消息係聲稱「基因編輯嬰兒」成功嘅南方科技大學副教授賀建奎被軟禁，住在南科大賓館一事，已係極度違反人權。賀建奎住在賓館套房，套房露台有鐵絲網阻止住客跳樓或爬出來，而其他套房露台就冇鐵絲網，情況迥異。再住落去，賀建奎幾容易患上中國高官常有嘅抑鬱症。
賀建奎違反科學研究倫理，不顧禁忌去創製一個基因編輯嬰兒，備受國際科學界譴責，聲譽大損，當然係佢自己攞嚟嘅，十足陸雲亭睇相。但佢究竟違反中國邊條法律呢？中國有無辦法搜集證據控告佢呢？南方科技大學係大學，又唔係執法機構，有乜權將一位副教授軟禁在大學賓館？賀建奎有無權利聘請律師辯護？中國究竟有無律師膽敢為賀建奎辯護？
只能有一個結論，中國對付一級水平科學家賀建奎嘅手段，完全無視人權，南方科枝大學校長及管理人員完全沒有人權概念，根本係行使「私刑」。賀建奎聲名本已掃地，被「自然」（Nature）選為2018年度科學界反派人物，是「基因編輯流氓」（CRISPR Rogue）；有此封號，賀建奎在科學界難有立足之地，但在法律上，中國何來法律根據，正式將賀建奎提堂受審？將佢私自軟禁，中國法治在國際科學界同樣冇面，被科學家恥笑。但在中國，科學家邊度敢出聲講人權，講威權就有之！
「蘋果日報」報導英國秘密檔案解封，有李光耀對中國人之觀察，真正一針見血：「中國人四千年的習慣會復辟，就是專制和不民主。」中國人與有中國文化影響的東南亞國家都是一樣，最緊要有飯吃，有錢搵，最重要心態是：「誰當皇帝，照樣納糧」，皇帝做乜都得，人權不重要，大家發達就掂，中國如是，泰國、柬埔寨、越南等亦然，只有曾是英國殖民地之馬來西亞新加坡長期行英國式議會制，但新加坡出了一位一千年難得一見嘅人物李光耀，係世界上唯一一個識得/夠膽利用共產黨上位而跟住捕殺共產黨人嘅政治人物，佢對中國人性格認識透徹，全力搞經濟，控制傳媒，打擊貪污，打壓反對黨，造成人民行動黨一黨獨大，選舉常勝嘅政治局面，用西方民主手段行使中國式威權政治，李光耀政績明確顯示，統治新加坡大目標係大家有錢搵，華人便不會有多怨言。香港現在正沿着這個方面前進。