【黑鏡線索】
2018年最後一篇，分享吓今年睇過嘅書裏面，影響最深嘅心水之選。
【創業/營運類】
喺本欄介紹過Basecamp嘅文章，同埋結集成新書嘅《It Doesn't Have to Be Crazy at Work》。當中提到嘅"calm company"概念對自己公司去年做嘅改變好有用，首先係要擺脫「忙亂癲慘先係勁」嘅諗法，然後明白，擺脫唔係冇可能，係有方法。
另一本好重要嘅，係《Profit First》，好實際，因為有用即係蝕錢變賺錢。Basecamp講咗好多年，唔應該間間startup都當自己係Uber、facebook等等咁營運，唔係aggregator但盲目咁諗住蝕住谷大，諗住一路靠輸買時間，一再逃避賺錢所需要嘅紀律，往往最後得個吉。世事好多最後都係紀律問題，賺錢如是減肥如是，《Profit First》作者係過來人，志願係消滅創業貧窮，針對蝕錢人士嘅紀律問題同人性弱點，整咗個框架一步一步跟住做，去幫公司達到財政健康。
【健康類】
年頭嘅一個目標，係今年開始對自己好啲，忽略咗健康好耐，越拖得耐越還得甘。姿勢係最差嘅一環，抱小朋友一陣腰痠背痛，打波忽然戚親呢度嗰度，瞓覺起身又呢度唔舒服嗰度唔聚財，呢啲情況好多朋友步入三十中開始經常面對。
《Becoming a Supple Leopard》呢本書一炮過講清楚mobility問題，本書鋪排完全適合一啲要框架要系統要由底明起嘅人，建議先試睇頭一二章，睇到唔瞓着就即係好適合睇埋落去。實體書又厚又重，外表嚇人，但厚係因為作者將幾個基本概念，由頭到腳身體主要部位掃一次，同埋好多圖，同埋其實唔使一次睇晒，本書有貼士可以邊度最有問題首先睇邊度。唔好俾作者Kelly Starrett嘅Dr銜頭搞到以為係冇實際，其實佢係一間cross fit gym教練兼老闆，有心改善姿勢嘅人，呢本值得嘗試。如果想輕鬆啲入手，可考慮同一作者嘅新作《Deskbound》。
【歷史類】
近年西方國家唔少政治人物開始開到口講話要改變對中國嘅態度同睇法，再唔係下下克林頓式乜都遷就同情放任以和為貴。同時香港唔少朋友都發覺要重申檢討一直以來嘅假設，例如儍更更深信五十年不變嘅承諾，而呢一啲假設，係源自陶傑成日講嘅對近代史嘅無知。其實點只近代史，直頭成個信史，喺教科書學嗰一套，都係充滿疑點，只不過讀書時，一係掛住背書冇咁留意當中嘅反駁位，就算留意到都唔容易搵替代版本。根據教科書嘅大中華膠版本，會造成好多前後左右呼應唔到嘅情況，例如講元朝講到好似蒙古帝國殺到去歐洲好似有幸榮焉咁，明明漢人係被征服嘅四等公民，或者明明清朝係滿洲人帝國，但滿人被驅逐之後民國好老奉咁承繼帝國版圖但又話自己係共和。
當然中間剪走咗大量材料，清後中國神話嘅建構過程，聯省自治毛姓青年搞湘獨等等，當然唔提，而一向講中原只講中原，講近代中國唔講後面扯線嘅馬列病毒宿主蘇聯唔講白手套，就好似講朝鮮戰爭唔提中美，將配角當主角辦，咁都竟然拼湊出一個版本出嚟，都算係一個剪接奇蹟。要解毒，建議可以由《經與史》、《遠東的線索》開始，夠時間嘅，可以掃埋《中國歷史的長河》系列自己判斷，同大中華膠版比較，邊個版本合情合理。
撰文：宋漢生