講到「今期流行」嘅男人，梗係演藝人協會會長古天樂啦！佢憑住同謝安琪合唱《（一個男人）一個女人和浴室》呢半首歌「重返」樂壇，前晚仲喺商台叱咤頒獎禮、以大熱姿態勇奪「我最喜愛男歌手」，呢單嘢不單獲網民熱議，估唔到連自由黨榮譽主席田北俊同埋大嘥鬼都食住上，藉古天樂拎獎呢單嘢借題發揮，乘機抽吓水。
先講番呢個「最喜愛」係由歌迷投票，並唔係同歌喉掛鈎，睇呢首合唱歌嘅官方MV喺YouTube點擊率近60萬，就知幾受歡迎，所以即使古天樂話自己唔識唱歌，攞到呢個獎都唔令人意外。
不過，古天樂今次唔識唱歌都拎到「我最喜愛男歌手」就好有啟發性，令人相信香港仲有奇蹟。好似曾炮轟律政司喺UGL案涉「此地無銀」、放生前特首梁振英嘅自由黨榮譽主席田北俊咁，佢見到古天樂都攞「我最喜愛男歌手」，似乎好鼓舞，前晚深夜喺facebook專頁上載望住師傅切三文魚嘅相，留言話：「為咗慶祝古天樂攞最喜愛的男歌手，我今晚決定食多D！」並hashtag「香港人唔好放棄」、「nevergiveup」、「希望今年會有奇蹟發生」及「香港加油」等！
雖則田少冇講明「奇蹟」係乜，但唔少網民似乎聽到田少弦外之音，留言「如果告嗰條狗，咁就真係有奇蹟」，另有唔少人表態叫田少去馬，「你都可以選到特首」！之不過咁，特首並唔係由市民投票選出，田少要變古天樂，喺小圈子選舉內好有難度囉！
大嘥鬼好鍾意唱歌
古天樂除咗令田少有希望，一樣令大嘥鬼有希望，佢噚日係fb發文，話新一年希望香港嘅朋友仔更加注重源頭減廢，明白「揼少啲慳多啲」嘅真正道理；而佢hashtag咗#我真係好鍾意唱歌、#只係唔識唱箒、#香港樂壇幾時還大嘥鬼一個交代，擺明又抽古天樂水。有網民亦留言撐佢：「期待鬼鬼同阿德（清潔龍）出年攜手上叱咤攞獎！」
李八方