星期二英超，阿仙奴喺上輪以1:5大敗利物浦後迎嚟新年第一戰，主場對同樣座落喺倫敦嘅富咸。阿仙奴今場收起上場表現麻麻嘅盧卡斯托拉拿同列治史迪拿，改派古安杜斯同哥斯尼正選登場，加上見富咸防守差，派上兩大前鋒拿卡錫迪同奧巴美揚，力求反底！結果一心求勝嘅阿仙奴喺25分鐘，由美蘭尼爾斯左路放出高波，格列沙加插入禁區喺無人看管之下射成1:0先開紀錄。
雙方之後一直維持呢個比數，直到下半場55分鐘，阿仙奴又喺左路發難，奧巴美揚傳波畀後上嘅哥拉辛拿斯，後者再回傳畀位置更佳嘅拿卡錫迪一射入網，幫槍手領先到2:0。富咸要等到69分鐘，先靠賴恩施斯隆傳中畀阿布巴卡卡馬拉撞入追番球，但阿仙奴喺79同83分鐘，分別靠艾朗藍斯同奧巴美揚各建一功，以4:1大炒富咸，一吐烏氣，新年有個好開始。