有讀者上周六喺港珠澳大橋香港口岸，見到一架俗稱「金巴」嘅單層穿梭巴士自炒撞欄，車頭損毀；直至當日深夜，失事金巴由吊臂車拖走，讀者仲懷疑失事金巴係逆線行車㖭！
唔係嘛，港珠澳大橋通咗車兩個月有多，金巴車長仲未熟路？小記即刻向營運金巴嘅港珠澳大橋穿梭巴士有限公司求證，有冇件咁嘅事，金巴嘅公關承認喺上年12月29號、接近夜晚7點有金巴失事，但強調冇逆線；公關解釋，金巴喺口岸路段轉彎嗰陣，駕駛室入面有嘢跌落嚟，轉移咗車長注意力，導致金巴同路側護欄「碰刮」喎！車長返晏，意外嗰陣揸第一轉單程空載去香港口岸，意外發生之後已經即時報警。
公司發出停班指示
公關又話，嗰位車長44歲，由03年到𠵱家一直揸開大型巴士，有15年相關經驗，安全行駛里程超過100萬公里，入職後亦一直表現良好；對於今次事故，公司即日對車長作出停班指示，視乎損失情況再作進一步處理，並且喺內部發佈意外經過，提醒員工吸取今次意外嘅教訓。
警方表示，姓彭車長當時沿順旅路向順暉路交通交滙處行車嗰陣失控，先撞燈柱再掃欄鏟上路壆，事件中冇人受傷。