受一道政治低壓槽影響，近年參與群眾運動嘅人買少見少，好似前日民陣舉辦嘅元旦遊行咁，人數由去年1萬人跌到今年5,500人左右；雖然係咁，但睇番籌款數字，其實又唔係真係差咗好多喎！
舊年元旦遊行，專為協助抗爭者同政治犯而設嘅守護公義基金，總共籌到37萬元，估唔到今年遊行人數少咗差唔多一半，但基金依然籌到34.2萬元，跌幅少過遊行人數，都算唔係太差。政黨方面，以往各主流民主派政黨都會為民陣籌款，今年因應民陣有財政壓力，幾個主要民主派政黨好似民主黨、公民黨、工黨、民協同埋社民連都傾力相助，幫民陣籌款應付營運開支；結果各黨喺未扣除開支下，就為民陣籌到13.3萬多元。民陣召集人岑子杰喺fb發文，感謝各位市民對民陣嘅支持。
八方問過守護公義基金信託人之一嘅工黨何秀蘭，佢話遊行人數減少都有咁嘅成績算係好好，相信因為過去一年政府嘅政治檢控，加上佔中九子案開審後，佢哋為咗承擔公民抗命責任而喺法庭上嘅陳詞，感動到唔少人，所以令大家願意慷慨解囊。