有「愛美神」美譽、47歲嘅黎姿（現名黎珈而）婚後生咗三個囡囡，雖然要幫細佬打理醫學美容嘅生意，但每逢大時大節都會同三個寶貝女去旅行。噚日下晝大約兩點，黎姿同三個囡囡、兩名工人步出機場接機大堂，隨即有保鑣護駕，素顏同着運動裝嘅黎姿一發現有傳媒，喺保鑣護送下急步向停車場方向行去，刻意同囡囡分開。黎姿全程未有回答問題，甚至囡囡想行去拖實佢，佢亦示意阿女唔好行近，最後護送囡囡上車後，佢先同大家講：「新年快樂！辛苦晒！」
重提《白恤衫》
另外，黎姿當年同鄭伊健合作拍《古惑仔》成為好朋友，為咗支持好友嘅演唱會，破天荒同伊健齊齊接受訪問。佢哋互讚大家keep得好好，𠵱家都各有家庭，黎姿覺得幸褔好簡單，只要識得感恩同容易滿足，幸褔之門就會打開：「人生有起有落，有成功有失敗，即使係落嘅時候都要感恩，挫折咪當係一個人生鍛煉。」伊健亦認為做人唔使太複雜！而伊健對黎姿當年大熱嘅歌曲《白恤衫》好難忘，仲對住黎姿唱番幾句，搞到黎姿忍唔住大笑，跟住佢哋提番當年拍戲嘅趣事，黎姿話自己有畏高，但其中一場戲講佢畀人追斬，同伊健喺簷篷跳落地下，黎姿話：「嗰陣以為有替身，點知原來埋位就要跳落去，真係好驚！」
撰文：馮仁昭