大除夕晚主持咗煙花倒數儀式嘅特首林鄭月娥，當晚都喺facebook上載回顧2018年嘅短片。毫不意外，林鄭喺短片入面，繼續一面倒自吹自擂，先擦鞋話2018年係國家改革40周年，佢好叻咁率領代表團訪問深圳同北京、又參加咗首屆中國國際進口博覽會，而香港金融發展誇啦啦、香港又同內地簽署兩地合作安排、高鐵香港段同港珠澳大橋落成啟用等，大晒自己「政績」。
之不過咁，去年律政司司長鄭若驊「放生」收取UGL 5,000萬嘅前特首梁振英、而鄭若驊大宅被發現違法搞僭建、香港民族黨被禁壓制言論同結社自由，以至政府DQ劉小麗立法會同朱凱廸村選資格嘅大事，林鄭隻字不提，佢所呈現嘅一片歌舞昇平，同民間社會覺得香港接近玩完，形成強烈對比。