新年第一擊，八方梗係搵啲靚嘢等大家醒醒神。最近嶄露頭角參與「天下為公」追擊梁振英UGL事件嘅民主黨靚女乳鴿梁翊婷（Edith），因為標致相貌俾網民封為女神。嗱，女神收兵係自然定律，但原來女神都會「被收兵」，自爆因為一個男人踏上政途，呢位仁兄竟然係已經走入建制嘅民主思路湯家驊。
地區收兵 備戰區選
28歲嘅Edith同唔少90後港女一樣鍾意追星，但人哋追明星，佢就追政治明星，從政起點係公民黨，佢話大律師黨有型吖嘛，中六自薦做湯家驊（現已退黨）嘅義工助選，大爆當年湯狀曾包起間cafe同義工同事開P，仲自彈自唱，好有魅力。回憶總是美好的，對於湯狀華麗轉身走入建制，Edith都話好失望，好似有啲被騙咁。魅力嘅嘢咁虛，都係踏實啲好，2016年Edith正式加入民主黨揼石仔。
Edith嘅政治啟蒙都嚟得十分早，小一時校長喺六四當日問咗一句知唔知今日咩日子？唔知就返屋企問，求知欲旺盛嘅Edith照做，家人就畀咗好多剪報、錄影帶佢睇，一個6歲小朋友都對事件難以忘懷，六四燭光就咁薪火相傳，一路到中五，走去做支聯會義工。
咪以為Edith搞搞震唔讀書，佢喺莊啟程預科書院畢業後入讀城大英文系，但都繼續「搞政治」，走去選學生會莊，點知遇着共青團入侵，俾班內地生集體投不信任票，由任評議會主席嘅內地生兼任埋會長，女神上莊不成就參加兩岸交流活動，結果離政治更接近，同各地華人溝通交流政局，畢業後從事傳媒；前財爺曾俊華去年選特首，Edith都係助選薯粉之一。
𠵱家喺觀塘區服務嘅Edith話做區係希望「落地生根」，喺地區收兵……吖唔係，係爭取街坊支持，積極備戰今年區選，仲話有心理準備要做多過一屆先可能成功挑戰。Edith最近當選埋民主黨中委，希望為黨發揮更多作用，又開始接手幫忙「天下為公」工作，唔知689會唔會成為女神政途另一位重要男人，成功狩獵呢隻狼呢？
李八方