新一年新景象，曼聯呢個2018「收爐戰」就巴閉喇！星期日英超尾場，亦都係2018年最後一場，改由蘇斯克查做看守領隊嘅曼聯繼續虎虎生威，主場4:1炒般尼茅夫，中場保羅普巴入2球1助攻，幫蘇B上任後3戰全勝共入12球，而佢嘅前場自由人角色，佢自己同埋蘇B都相當滿意喇。
2入球1助攻炒般茅4:1
紅魔今場五分鐘就有拉舒福特喺右路扭過兩個般茅後衞後，傳中畀普巴近門射入，到33分鐘普巴再用頭槌建功，45分鐘輪到拉舒福特接應安東尼馬迪爾嘅傳中，瞓身用腳面鏟入，雖然般茅完半場前有尼敦阿基頂入追近，但係72分鐘後備落場嘅盧卡古，接應普巴妙傳幫曼聯埋齋。賽事仲有段插曲，79分鐘曼聯中堅艾歷拜利粗野攔截般茅翼鋒賴恩費沙，俾球證直紅趕出場。
就咁睇，曼聯踢法係直接咗同多咗傳中，呢個就係蘇斯克查嚟到後嘅戰術變化，而最大受益者似乎係盛傳同前領隊摩連奴不和嘅普巴。事關佢喺呢3輪聯賽入咗4球同有3助攻，佢嘅位置前移唔使再控制節奏，反而好自由咁走入禁區，又唔太使兼顧防守。從今場嘅走位熱點圖睇，普巴主要出現喺左中場，佢就大讚蘇B嘅進攻足球叻過摩佬好多：「我哋𠵱家嘅踢法比之前侵略性強，機會多好多。同前任領隊相比，我哋一樣贏到一啲賽事，不過風格就唔同，你可以見到所有球員都好享受足球。」睇番普巴今場兩次入波之後都勁舞慶祝，就知佢冇吹水，真係好享受足球喇！
蘇B讚普巴頂級中場
蘇斯克查亦大讚普巴踢得踏實，係個頂級中場！而且，普巴喺蘇B領軍呢3仗入4球，較今季由摩連奴教嘅頭17場英超仲要多，而普巴都係自12年12月嘅朗尼後，第一位連續兩場英超入至少兩球嘅曼聯球員。連拎九分後，曼聯追到同第5位嘅阿仙奴只差3分。